Павіншавалі пераможцаў!

17–24 лютага 2015 года Беларусь прымае чэмпіянат свету па біятлоне сярод юнакоў і юніёраў. Пляцоўкай правядзення спаборніцтваў стаў Рэспубліканскі цэнтр алімпійскай падрыхтоўкі па зімовых відах спорту  "Раўбічы" - адзін з лепшых біятлонных комплексаў у свеце.

19 лютага студэнты факультэта дашкольнай адукацыі БДПУ  разам з намеснікам дэкана па вучэбнай рабоце І.Г. Гушчынскім і выкладчыкам кафедры методык дашкольнай адукацыі І.М. Іваноўскай з задавальненнем скарысталіся магчымасцю наведаць цырымонію ўзнагароджвання пераможцаў чэмпіянату, а таксама ўвачавідкі ўбачыць мадэрнізаваны і толькі нядаўна адчынены пасля рэканструкцыі спорткомплекс "Раўбічы".

Нягледзячы на не зусім "біятлоннае" пахмурае надвор'е на мерапрыемстве панавала прыязная ўрачыстая атмасфера. Заўзятары падзялілі радасць перамогі са спартоўцамі і зрабілі памятныя фатаздымкі з удзельнікамі спаборніцтваў.